వర్షం కారణంగా భారత్-పాక్ మ్యాచ్ రద్దయితే ఏమవుతుంది?

టీ20 వరల్డ్ కప్‌లో అభిమానులు ఎంతో ఆసక్తిగా ఎదురుచూస్తున్న భారత్-పాకిస్థాన్ మ్యాచ్‌పై నీలినీడలు కమ్ముకున్నాయి. శ్రీలంకలోని కొలంబో వేదికగా ఈరోజు (ఫిబ్రవరి 15) రాత్రి 7 గంటలకు ప్రారంభం కానున్న ఈ హైవోల్టేజ్ పోరుకు వర్షం అంతరాయం కలిగించే అవకాశం ఉందని వాతావరణ శాఖ హెచ్చరించింది. ఒకవేళ మ్యాచ్ వర్షం కారణంగా పూర్తిగా రద్దయితే పరిస్థితి ఏంటనే దానిపై సర్వత్ర ఆసక్తి నెలకొంది.

అంతర్జాతీయ క్రికెట్ మండలి (ఐసీసీ) నిబంధనల ప్రకారం టీ20 మ్యాచ్‌లో ఫలితం తేలాలంటే ఇరు జట్లు కనీసం 5 ఓవర్ల చొప్పున బ్యాటింగ్ చేయాల్సి ఉంటుంది. ఒకవేళ ప్రతికూల వాతావరణం కారణంగా కనీసం 5 ఓవర్ల ఆట కూడా సాధ్యపడకపోతే, మ్యాచ్‌ను 'ఫలితం తేలలేదు' (No Result)గా ప్రకటిస్తారు. ఈ టోర్నీలో గ్రూప్ స్టేజ్ మ్యాచ్‌లకు రిజర్వ్ డే సౌకర్యం లేదు. దీంతో మ్యాచ్ రద్దయితే ఇరు జట్లకు చెరో పాయింట్ కేటాయిస్తారు.

ప్రస్తుతం గ్రూప్-ఏలో భారత్, పాకిస్థాన్ జట్లు చెరో 4 పాయింట్లతో పటిష్ట స్థితిలో ఉన్నాయి. ఈ మ్యాచ్ వర్షం వల్ల రద్దయి చెరో పాయింట్ లభిస్తే, ఇరు జట్ల పాయింట్ల సంఖ్య 5కు చేరుకుంటుంది. దీంతో మిగతా జట్లకు అవకాశం లేకుండానే భారత్, పాకిస్థాన్ రెండూ సూపర్-8 దశకు అర్హత సాధిస్తాయి. బంగాళాఖాతంలో ఏర్పడిన అల్పపీడనం కారణంగా కొలంబోలో వర్షాలు కురిసే అవకాశం ఉందని స్థానిక వాతావరణ శాఖ వెల్లడించింది.

అయితే, ఈ ఉదయం కొలంబోలో వాతావరణం మేఘావృతమై ఉన్నప్పటికీ, గత రాత్రి నుంచి వర్షం పడలేదని తాజా సమాచారం. ప్రేమదాస స్టేడియంలో అత్యాధునిక డ్రైనేజీ వ్యవస్థ ఉండటంతో వర్షం ఆగితే గంటలోపే మైదానాన్ని సిద్ధం చేయగలరు. అయినప్పటికీ, మ్యాచ్ భవితవ్యం పూర్తిగా వాతావరణంపైనే ఆధారపడి ఉంది.